काठमाडौंको नयाँ बसपार्कस्थित एक गेस्ट हाउसमा २५ वर्षीया युवती मृत फेला परेकी छन्। प्रहरीले घटनालाई हत्या भएको निष्कर्ष निकाल्दै संलग्न व्यक्तिको खोजी तथा घटनाबारे विस्तृत अनुसन्धान अघि बढाएको जनाएको छ।
जिल्ला प्रहरी परिसर काठमाडौंका प्रहरी उपरीक्षक (एसपी) पवनकुमार भट्टराईका अनुसार आइतबार नयाँ बसपार्क क्षेत्रमा रहेको एक गेस्ट हाउसको कोठाभित्र कैलालीको धनगढी उपमहानगरपालिकाकी २५ वर्षीया निशा सुनार मृत अवस्थामा फेला परेकी हुन्। प्रारम्भिक अनुसन्धानका आधारमा उनको हत्या भएको देखिएको प्रहरीले जनाएको छ।
प्रहरीका अनुसार गेस्ट हाउस सञ्चालकले कोठाभित्रबाट अस्वाभाविक गन्ध आउन थालेपछि प्रहरीलाई जानकारी गराएका थिए। त्यसपछि घटनास्थल पुगेको प्रहरी टोलीले कोठाभित्र शव फेला पारेको हो। घटनास्थलको मुचुल्का तयार गरी आवश्यक प्रमाण संकलन गरिएको प्रहरीले जनाएको छ।
मृतकको शव पोस्टमार्टमका लागि त्रिभुवन विश्वविद्यालय शिक्षण अस्पतालमा राखिएको छ। पोस्टमार्टम प्रतिवेदनपछि मृत्युको कारणबारे थप तथ्य खुल्ने अपेक्षा गरिएको प्रहरीले जनाएको छ।
प्रहरीले घटनामा संलग्न व्यक्तिको पहिचान र पक्राउका लागि अनुसन्धान तीव्र बनाएको जनाएको छ। घटनासँग सम्बन्धित विभिन्न पक्षको अनुसन्धान भइरहेको र आवश्यक प्रमाण संकलनको कार्य जारी रहेको प्रहरीको भनाइ छ। अनुसन्धान नसकिएकाले घटनाका थप विवरण सार्वजनिक गरिएको छैन।
प्रतिक्रिया दिनुहोस्