फेसबुकमा आयो प्राविधिक समस्या

काठमाडौं- सामाजिक सञ्जाल फेसबुकमा अस्थायी प्राविधिक समस्या देखिएपछि केही प्रयोगकर्ताले आफ्नो खाता (Account) मा लगइन गर्न नसकेको गुनासो गरेका छन्। समस्या देखिएका प्रयोगकर्ताको स्क्रिनमा “Account Temporarily Unavailable. Your account is currently unavailable due to a site issue. We expect this to be resolved shortly. Please try again in a few minutes.” भन्ने सन्देश देखिएको छ।

फेसबुकको आधिकारिक सहायता केन्द्रका अनुसार यस्ता सन्देश देखिनु सामान्यतया प्लेटफर्ममा भइरहेको अस्थायी प्राविधिक सुधार (maintenance) वा डेटाबेससम्बन्धी कार्यका कारण हुन सक्छ। यस्तो अवस्थामा प्रयोगकर्ताको खाता हटेको वा स्थायी रूपमा बन्द भएको भन्ने अर्थ नलाग्ने फेसबुकले जनाएको छ। कम्पनीका अनुसार समस्या समाधान भएपछि प्रयोगकर्ताले पुनः सामान्य रूपमा आफ्नो खाता प्रयोग गर्न सक्नेछन्।

फेसबुकले यस्ता अवस्थामा केही समय पर्खेर पुनः लगइन गर्न, इन्टरनेट जडान जाँच्न तथा आवश्यक परे अर्को ब्राउजर वा उपकरणबाट प्रयास गर्न सुझाव दिएको छ। यदि समस्या प्लेटफर्मकै प्राविधिक कारणले भएको हो भने प्रयोगकर्ताले कुनै अतिरिक्त प्रक्रिया अपनाउन आवश्यक नपर्न सक्छ।

यसअघि पनि फेसबुक, इन्स्टाग्राम र म्यासेन्जरमा विश्वव्यापी प्राविधिक समस्या देखिएका उदाहरणहरू रहेका छन्। त्यस्ता अधिकांश समस्या केही समयपछि कम्पनीले समाधान गर्दै सेवा पुनः सञ्चालनमा ल्याएको थियो।

हाल देखिएको समस्याबारे फेसबुक (मेटा) ले प्रयोगकर्तालाई धैर्य गर्न आग्रह गर्दै सेवा छिट्टै सामान्य हुने संकेत दिएको आधिकारिक सहायता सामग्रीमा उल्लेख गरिएको छ।