वुटवल- नेपाल पत्रकार महासंघ लुम्बिनी प्रदेशको साधारण सभा पुस २ गते कपिलवस्तुमा हुने भएको छ । महासंघको भालुवाङमा बसेको बैठकले केन्द्रीय परिपत्र अनुसार साधारण सभा पुस २ गर्ने निर्णय गरेको हो ।

बैठकले साधारण सभा सम्पन्न गर्न वसन्त गिरीको अध्यक्षतामा मूल तयारी समिति गठन गर्नुका साथै महासचिव विक्रम खड्काको संयोजकत्वमा प्रचार प्रसार तथा सचिवालय समिति गठन गरेको छ ।

कोषाध्यक्ष यमनाथ घिमिरेको संयोजकत्वमा आर्थिक व्यवस्थापन समिति गठन गरेको बैठकले प्रदेश मातहतका साधारण सभा नगरेका शाखाहरूलाई अधिवेशन सम्पन्न गर्न आग्रह गर्ने निर्णय गरेको छ ।

बैठकपछि जारी विज्ञप्तिमा महासंघका जिल्ला शाखाहरूलाई प्रदेश पार्षदहरुको विवरण र सदस्यता नवीकरणको विवरण उपलब्ध गर्न उल्लेख गरिएको छ । महासंघले रुकुम पूर्वमा सदस्यता स्थानान्तरणका लागि आएका निवेदनमाथि छानबिन गरी अनुमोदनका लागि केन्द्रीय समितिमा पठाउने निर्णय गरेको छ ।