काठमाण्डाै – समस्याग्रस्त सहकारी व्यवस्थापन समितिले समस्याग्रस्त घोषणा भएका १८ वटा सहकारी संस्थाबाट ऋण लिएका ऋणीलाई ऋण तिर्न सात दिने अल्टिमेटम दिएको छ ।
समितिले आज सूचना निकालेर सात दिनभित्र ऋण तिर्न भनेको हो । ऋण तिर्न अन्तिम पटक ऋणी र जमानतकर्तालाई सात दिनको समय दिइएको र सात दिनभित्र ऋण चुक्ता नगरे ऋण र जमानतकर्ताको एकाघर परिवारका सदस्यको सम्पत्ति रोक्का र कालोसूचीमा राख्ने समितिले निकालेको सूचनामा उल्लेख छ ।
समस्याग्रस्त घोषित संस्थाका सञ्चालक, व्यवस्थापक, ऋणी सदस्य र कर्मचारीलाई आफ्नो दायित्व भुक्तानीका लागि पटक–पटक राष्ट्रियस्तरको पत्रपत्रिका र एसएमएसमार्फत ३५ दिने सूचनासमेत प्रेषित गरेको समितिले जनाएको छ ।
धेरैजसो ऋणी सदस्यले सम्पर्क पनि नगरेको र आफूले तिर्न/बुझाउनुपर्ने दायित्वसमेत तिरे/बुझाएको नदेखिएकाले अब सम्पत्ति रोक्का राख्ने, कालोसूचीमा राख्ने र एकाघर परिवारको सम्पत्ति बिक्री गरेर ऋण असुल गर्ने निर्णय भएको समितिले जनाएको छ ।
सूचना
यस्तै समितिले अर्को सूचना निकालेर समस्याग्रस्त घोषणा भएकामध्ये १० वटा सहकारी संस्थाका बचतकर्तालाई छुट मागदाबी पेश गर्न १५ दिनको मौका दिएको छ । समितिले निकालेको सूचनामा अन्तिम पटक छुट दाबीका लागि १५ दिनको समय दिएको उल्लेख छ । पहिले मागदाबी पेश गर्नेको बचत रकम फिर्ता भएपछि बाँकी हुन आएको रकमबाट मात्रै छुट दाबी पेश गर्नेको बचत दामासाहीमा फिर्ता हुने समितिले जनाएको छ ।
सूचना
