काठमाण्डौ – नेपाली कांग्रेसको अगुवाईमा वैकल्पिक सत्ता समीकरण बनाउने सपना चकनाचुर भएको छ । वर्तमान सत्तारुढ दल जनता समाजवादी पार्टी (जसपा)को विभाजनले उक्त सपना चकनाचुर बनाएको हो । जसपाको विभाजनले वर्तमान सत्ता गठबन्धनलाई कुनै असर नपर्ने देखिएको छ । अब एकीकृत समाजवादी र जसपा नेपाल नहुँदा पनि सत्ता गठबन्धनमा बहुमत पुग्ने देखिएको छ ।
वर्तमान सत्ता समिकरणको २७५ सदस्यीय प्रतिनिधिसभामा एमालेका ७८, माओवादीका ३२, रास्वपाका २१ र अशोक राई पक्षका जसपाका सात सांसदको समर्थन हुँदा मात्रै पनि सरकारलाई बहुमत पुग्छ । त्यसैगरी नागरिक उन्मुक्ति पार्टीका अध्यक्ष रञ्जिता श्रेष्ठ पक्षका दुई तथा प्रभु साह र दुई स्वतन्त्र सांसदको पनि सरकारलाई समर्थन रहेको छ ।
एकीकृत समाजवादीका अध्यक्ष माधवकुमार नेपाल र जसपा अध्यक्ष उपेन्द्र यादव कांग्रेससँग मिलेर नयाँ गठबन्धन बनाउने प्रयासमा लागेको चर्चा भइरहेको बेला जसपा विभाजन भएको हो ।
