दाङः दाङको बंगलाचुलीस्थित कोइलाखानीको सुरूङभित्र मृत फेला परेका शिवराज केसीको हत्यामा संलग्न भएको आरोपमा प्रहरीले श्रीमान, श्रीमतीसहित चार जनालाई पक्राउ गरेर सार्बजनिक गरेको छ ।प्रारम्भिक अनुसन्धान अनुसार मृतक केसीको दीपासँगको अनैतिक सम्बन्धका कारण हत्या गरिएको खुल्न आएको छ ।

गोली हानेर हत्या भएको अवस्थामा कोइलाखानीको सुरूङभित्र पुस १३ गते ४५ वर्षीय शिवराज केसीको शव फेला परेको थियो । पक्राउ पर्नेमा बंगलाचुली गाउँपालिका-४ गदारीका ४३ वर्षीय शेरबहादुर कुँवर, उनकी ३५ वर्षीया श्रीमती दीपा कुँवर र दीपाका भाइ २९ वर्षीय तिलक पुन, भरूवा बन्दुक दिने मेघबहादुर कुवर मगर व्यक्ति रहेको जिल्ला प्रहरी प्रमुख एसपी रामबहादुर केसीले बताउनुभयो ।

मेघराज कुँवरको घरबाट बन्दुक एक नाल, बन्दुकमा प्रयोग हुने छर्रा १०८ थान, गोलाकार ठूला दुई थान गोली, लाम्चाकार ठूला गोली ३९ थान, बारुद ७५ ग्राम, केप ५ थान र हरियो सुती कपडाको लत्ता एक थान बरामद गरी मेघराजलाईसमेत पक्राउ गरेको थियो। पक्राउ परेकाहरुविरुद्ध अनुसन्धान भइरहेको प्रहरीले जनाएको छ।